وري رهي ٿي جهڙالي موسم وري اهي ئي خيال آھن،
هوا مان خوشبو اچي ٿي تنهنجي وري اهي ئي وصال آھن.
17/07/2020
07/07/2020
برسات وسي ٿي پئي
برسات وسي ٿي پئي
ڪا ڳالھ چوي ٿي پئي
پر يار! الئہ ڪنھن لئہ؟
ھر صبح ھوائن ۾
ھر شام گھٽائن ۾
مڌُ ماٽيون بہ اوتيل ھن
۽ منھنجي دريءَ کان ٻاھر
اڄ ڪويل ڪوڪاري
ڪا ڳالھ چوي ٿي پئي
پر يار! الئہ ڪنھن لئہ؟
سنگيت ٻڌان ٿو مان
ڪجھ گيت لکان ٿو مان
۽ پنھنجون اکيون ٻيئي
ھن کڙڪيءَ جي ھُن پاسي
ڪنھن سڏ جِيان اُڇلي
ڇا ڇا نہ ڏسان ٿو مان
گهنگهور گهٽائن مان
ڪا وڄ وري ٿي پئي
ڪا ڳالھ چوي ٿي پئي
پر يار! الئہ ڪنھن لئہ؟
راڌا بہ ڪٿي ناھي
ميران جو پتو ناهي
ھي روڳ ڀريو جيون
بنواس ڪٽي ٿو پيو
ھئہ شيام سندي بنسي
ھر شام وڄي ٿي پئي
پر يار الئہ ڪنھن لئہ؟
مان ساھ کڻان ٿو پيو
ڄڻ آھ ڀريان ٿو پيو
دل منھنجي چري وانگي
ھي شھر بہ خالي آ
ڪا راھ رھي ڪانھي
ڪا واھ رھي ڪانھي
ھن خالي شھر مٿان
برسات وسي ٿي پئي
ڪا ڳالھہ چوي ٿي پئي
پر يار الئہ ڪنھن لئہ؟
تون مان نہ ملياسين ۽
ٿيا ڪيئي ورھيہ آھن
سج لھندا هتان ويا جيئن
ڇا ڇا نہ لٿو آ تيئن
تون مان نہ رھيا آھيون
پر پوءِ بہ پرين پنھنجي
ھن ڏيھہ سڄي ۾ ڏس
هڪ ڳالھہ ھلي ٿي پئي
ڪا ڳالھہ ھلي ٿي پئي
پر يار!
الئہ ڪنهن لئہ؟
پر يار!
الئہ ڪنهن لئہ؟؟